“U miratua në 10 orë”, Himçi sulmon Ramën: Ligji për portet turistike i shërben interesave pranë qeverisë
Deputeti i Partisë Demokratike, Blendi Himçi, ka kritikuar ashpër ligjin për portet turistike, duke e cilësuar si një nismë klienteliste që dëmton konkurrencën e ndershme dhe favorizon një grup të kufizuar biznesmenësh.
Sipas Himçit, ligji i miratuar nga Këshilli i Ministrave dhe shumica qeverisëse përbën një tjetër rast të “ligjeve me porosi”, duke pretenduar se që nga ardhja në pushtet janë miratuar dhjetëra të tillë.
I ftuar në një emision televiziv, ai theksoi se kjo nismë cenon parimet e konkurrencës së lirë dhe bie ndesh edhe me direktiva të Bashkimit Europian, duke paralajmëruar mungesë transparence dhe kontrolli parlamentar në procesin e dhënies së licencave.
“Ligj me porosi, klientelist i radhës, në vazhdën e 18 ligjeve të tilla që janë miratuar nga kjo qeveri që nga ardhja në pushtet dhe janë bërë për një grup të caktuar. Cënohet pjesa e konkurrencës së ndershme. Cënohen edhe tre direktiva të BE-së, nuk do të kemi më konkurrencë të ndershme, ligji do të përcaktohet nga qeveria me një vendim të mbyllur të saj dhe do të mungojë kontrolli parlamentar për procedurën e dhënies së licencave të porteve në mënyrë të përbashkët. Investitori strategjik do të përfitojë lirshëm edhe portin.
Në komisionin përgjegjës ku jam nënkryetar, pyetjet ishin: a ka pasur kërkesa të tilla nga investitorët strategjikë dhe na u tha jo. U tha se Banka Botërore ka lënë detyrë të zhvillohen portet. Kur në fakt turizmit nuk i ofrojmë shërbimin e kualifikuar apo infrastrukturën. Për këto gjëra Shqipëria është e papërgatitur.
Projektligji është propozuar të martën, gjithçka u miratua për 10 orë. Cënimi i konkurrencës së ndershme privilegjon disa oligarkë pranë Ramës dhe biznesi nuk është më në pozitë të barabartë, dikush favorizohet, dikush diskriminohet. Edi Rama favorizon elitën”, tha ai.