Kryeministri Edi Rama ka prezantuar skemën e re për rritjen e përvitshme të pensioneve, duke premtuar një rritje progresive që do të arrijë deri në pesëfishim brenda vitit 2030.
Gjatë podcastit të kësaj të diele, ai bëri të ditur se rritja e aplikuar në janar do të vijojë të shtohet çdo vit: do të dyfishohet në janarin e ardhshëm, do të trefishohet në vitin 2028, katërfishohet në 2029 dhe pesëfishohet në 2030, duke synuar përmirësimin gradual të të ardhurave për pensionistët.
Paralelisht me këtë plan, qeveria po përgatit edhe një shtyllë të dytë të sistemit të pensioneve, e cila do të funksionojë si një skemë komplementare ndaj sistemit aktual. Sipas Ramës, kjo do të krijojë një mundësi shtesë për qytetarët që të ndërtojnë një fond individual për të ardhmen.
Ideja kryesore e kësaj skeme është që çdo punonjës të mund të kontribuojë me një shumë simbolike nga paga, për shembull 1 euro në muaj, ndërsa shteti ose punëdhënësi do të japë një kontribut të barabartë. Në këtë mënyrë, kursimi i individit dyfishohet dhe krijon një fond të qëndrueshëm me kalimin e kohës.
Kreu i qeverisë theksoi se ky model nuk është një risi lokale, por bazohet në praktikat më të mira ndërkombëtare, duke synuar të rrisë sigurinë financiare në moshën e tretë dhe të forcojë lidhjen mes punonjësve, shtetit dhe sektorit privat.
Sipas tij, kjo shtyllë e dytë nuk zëvendëson sistemin ekzistues të pensioneve, por e plotëson atë, duke krijuar një mekanizëm më të fortë dhe më të qëndrueshëm për të ardhmen e qytetarëve.