Sekuestrohen pasuri me vlerë 200 mijë euro në Tiranë, në pronësi të dy të dënuarve për drogë
Tiranë – Operacioni “Burimi” finalizohet me sekuestrim të pasurive
Policia e Tiranës, në bashkëpunim me Prokurorinë e Tiranës, ka finalizuar operacionin e koduar “Burimi”, duke sekuestruar pasuri me vlerë totale rreth 200 000 euro, në pronësi të dy shtetasve të dënuar për trafikim të lëndëve narkotike.
Në kuadër të këtij operacioni u ekzekutua vendimi i Gjykatës së Tiranës për vënien e sekuestros preventive mbi një apartament në zonën e Selitës dhe një garazh në Selitë e Vogël, në pronësi të Pajtim Braçaj, 63 vjeç, i dënuar në Shqipëri për trafikim të drogës, dhe Gjino (Shkëlqim) LLeshaj, 44 vjeç, i dënuar në Itali për trafikim të lëndëve narkotike.
Hetimet intensive janë kryer nga Seksioni për Hetimin e Pastrimit të Parave dhe Aseteve Kriminale pranë Drejtorisë Vendore të Policisë Tiranë, me fokus gjurmimin dhe sekuestrimin e pasurive të fituara nga aktivitet kriminal brenda dhe jashtë vendit. Policia njofton se hetimet për asete të tjera me origjinë kriminale, në pronësi të këtyre shtetasve dhe të lidhurve me ta, vijojnë.
Pajtim Braçaj, një nga shtetasit e përfshirë në këtë operacion, ishte arrestuar më parë më 17 tetor 2015, në kuadër të zbërthimit të një laboratori të madh të drogës në ish-Kënetën e Durrësit, ku u sekuestruan rreth 700 kg kanabis, me vlerë tregu që mund të kapte 1 milion euro. Ai dyshohej se transportonte drogë nga zona e Krujës deri te laboratori në Durrës. Operacioni ishte realizuar në bashkëpunim me Policinë e Tiranës, Shkodrës dhe ish-Prokurorinë e Krimeve të Rënda, në kuadër të aksionit të koduar “Koordinata”.
Policia thekson rëndësinë e sekuestrimit të pasurive të fituara nga aktivitet kriminal, duke dërguar një mesazh të qartë se të gjithë individët që përfshihen në trafik droge dhe pastrim parash do të ndëshkohen dhe do t’u konfiskohet pasuria e përfituar në mënyrë të paligjshme.