Rritja e çmimit të naftës paralizon transportin publik: Nga nesër 40% më pak mjete në qarkullim, mungon kompensimi
Sektori i transportit publik në vend po përballet me një krizë të thellë financiare, ndërsa operatorët kanë paralajmëruar masa drastike që do të ndikojnë drejtpërdrejt në përditshmërinë e qytetarëve.
Shoqata Kombëtare e Transportit Qytetas dhe Shoqata e Transportit Urban dhe Interurban bëjnë të ditur se, pavarësisht shqetësimeve të ngritura prej javësh dhe takimit të zhvilluar më 1 prill 2026 me institucionet përgjegjëse, nuk është marrë asnjë masë konkrete në mbështetje të sektorit.
Sipas tyre, nuk është miratuar asnjë skemë kompensimi për rritjen e çmimit të karburantit, nuk ekziston një plan veprimi për lehtësimin e barrës financiare dhe nuk është vendosur asnjë afat për ndërhyrje. Gjithashtu, nuk ka nisur rishikimi i elementeve fiskale që ndikojnë drejtpërdrejt në kostot operative, si akciza, taksa e qarkullimit dhe TVSH.
Operatorët theksojnë se kjo situatë ka përkeqësuar ndjeshëm gjendjen ekonomike të sektorit, duke i vendosur në vështirësi serioze për vijimin normal të aktivitetit.
Si pasojë, duke filluar nga dita e nesërme, flota e mjeteve të transportit publik do të reduktohet me 40%, si një masë e detyruar për të përballuar situatën emergjente.
Shoqatat u bëjnë thirrje qytetarëve për mirëkuptim dhe planifikim të udhëtimeve, duke nënvizuar se vendimi nuk është zgjedhje e operatorëve, por pasojë e mungesës së reagimit institucional në kohë.
Ndërkohë, ato shprehen të gatshme për dialog dhe bashkëpunim me autoritetet, duke kërkuar ndërhyrje të menjëhershme për të shmangur përkeqësimin e mëtejshëm të krizës në transportin publik.