“Sot në shesh”/ Këlliçi: Ja pse rikthehet podiumi në protestë
Deputeti i Partisë Demokratike, Belind Këlliçi, ka shpjeguar arsyet e rikthimit të podiumit dhe fjalimeve në protestën kombëtare të zhvilluar ditën e sotme në shesh, duke theksuar se kjo ka ardhur si një kërkesë e drejtpërdrejtë nga qytetarët.
Në një deklaratë për mediat, Këlliçi u shpreh se pas një periudhe njëmujore pa protesta, qytetarët kanë kërkuar hapësirë për të shprehur shqetësimet dhe problematikat që i prekin në jetën e përditshme.
Sipas tij, rikthimi i podiumit synon pikërisht t’u japë zë këtyre shqetësimeve, të cilat, sipas opozitës, janë përkeqësuar gjatë kësaj periudhe.
“Kemi kthyer podiumin për protestën e sotme pasi është një kërkesë që ka ardhur nga qytetarët. Pas një muaji pa protestë në shesh, ata duan të flasin për problemet që kanë ndodhur gjatë kësaj kohe,” deklaroi Këlliçi.
Ai renditi disa nga çështjet kryesore që, sipas tij, kanë shtyrë qytetarët të dalin në protestë. Ndër to përmendi çmimin e lartë të karburantit, duke theksuar se Shqipëria renditet ndër vendet me çmimet më të shtrenjta në Evropë.
Një tjetër problem i ngritur ishte ndërprerja e rreth 40% të linjave të transportit urban, që sipas Këlliçit prek rreth 400 mijë qytetarë, duke vështirësuar ndjeshëm lëvizjen e përditshme.
Gjithashtu, ai përmendi edhe çështje të tjera që kanë ngjallur debat publik, si shpenzimet për udhëtimet e kryeministrit dhe ngjarje të rënda si zjarri në një pallat pranë zonës së njohur si “Farmacia 10”.
“Këto janë arsye madhore që qytetarët të dalin në protestë. Kjo është arsyeja pse kemi rikthyer podiumin dhe fjalimet sot,” përfundoi ai.
Protesta e sotme vjen në një moment të tensionuar politik, ku opozita ka shtuar akuzat ndaj qeverisë dhe kërkon ndryshime të thella, përfshirë edhe krijimin e një qeverie teknike.