“Kjo është pasaporta europiane?” Plehra dhe fekale në kanalin e Çermë Sektorit në Divjakë, Korreshi thirrje institucioneve për ndërhyrje
Deputeti i Partisë Demokratike, Saimir Korreshi, ka denoncuar publikisht gjendjen e rëndë mjedisore në fshatin Çermë Sektor të Bashkisë Divjakë, përmes një videoje të publikuar në rrjetet sociale.
Në pamjet e shpërndara në Facebook, ai tregon kanalin kryesor të zonës, i cili ndodhet shumë pranë banesave dhe është i mbushur me plehra, fekale dhe mbetje të ndryshme, duke krijuar një situatë të rëndë ndotjeje dhe rreziku për shëndetin e banorëve.
Korreshi ka kritikuar ashpër pushtetin vendor, duke thënë se pavarësisht denoncimeve të mëparshme, situata jo vetëm që nuk është përmirësuar, por është përkeqësuar.
“Kjo është rruga kryesore që të çon në Çermë Sektor, njësia administrative Tërbuf, Bashkia Divjakë. Shihni ku janë hedhur plehrat, nuk ka kosha. Shihni si vijnë fekalet këtu: goma, plehra, ndotje e rëndë. Kjo është pasaporta europiane,” shprehet ai në video.
Ai ka vijuar me kritika ndaj autoriteteve lokale, duke vënë në dyshim menaxhimin e taksave dhe shërbimeve publike në zonë.
“Nuk di ku shkojnë taksat, por kam një vit që e kam denoncuar dhe gjendja është më keq. A jetohet kështu? A ka higjienë këtu? Këtu ka familje që jetojnë çdo ditë në këtë ndotje,” tha Korreshi.
Deputeti i PD-së i ka bërë thirrje institucioneve përgjegjëse që të marrin masa urgjente për pastrimin dhe zgjidhjen e situatës, duke theksuar se gjendja është e papranueshme për banorët e zonës.