Tronditëse në Stamboll: Vjehrra vret nusen 25-vjeçare me dy plumba në kokë – “Pastrova nderin tim”
Ngjarje e rëndë në Stamboll: Një 58-vjeçare dyshohet se ka vrarë nusen e saj 25-vjeçare, duke pretenduar se “pastroi nderin”. Detaje tronditëse nga krimi dhe motivet e dyshuara.
Një krim i rëndë ka tronditur Stamboll, ku një 25-vjeçare, e identifikuar si Bursin Sahin, dyshohet se është ekzekutuar nga vjehrra e saj, 58-vjeçarja Menekshe K.
Sipas raportimeve të mediave turke, ngjarja ka ndodhur mesditën e së shtunës brenda banesës së familjes, ku pas një debati të ashpër, vjehrra ka marrë armën dhe ka qëlluar dy herë në kokë nusen e saj, duke i shkaktuar vdekjen e menjëhershme.
Pas krimit, autorja dyshohet se ka dalë në ballkon dhe ka deklaruar me zë të lartë: “Vrava nusen, pastrova nderin tim”, ndërsa ka pritur mbërritjen e policisë në gjendje të qetë.
Burimet bëjnë me dije se motivi i ngjarjes lidhet me dyshimet e 58-vjeçares për tradhti bashkëshortore nga ana e viktimës. Djali i saj, bashkëshorti i 25-vjeçares, ndodhet në burg prej gjashtë vitesh, ndërsa çifti kishte edhe dy fëmijë.
Gjatë dëshmisë para autoriteteve, autorja ka deklaruar se kishte zbuluar mesazhe që, sipas saj, provonin tradhtinë. Pas një përballjeje me viktimën, e cila nuk kishte reaguar ndaj akuzave, ajo ka kryer aktin fatal.
Pas arrestimit, është zbuluar se 58-vjeçarja kishte precedent penal, pasi më parë ishte dënuar me 6 vite e 8 muaj burg për trafik narkotikësh.
Ngjarja ka shkaktuar reagime të forta në opinionin publik, duke rikthyer në vëmendje fenomenin e krimeve të justifikuara me të ashtuquajturin “nder”, një praktikë e dënuar gjerësisht nga ligji dhe organizatat ndërkombëtare të të drejtave të njeriut.