Conor McGregor rikthehet? Dana White jep verdiktin final: “Do të luftojë këtë verë”
Pas gati pesë vitesh larg nga Oktagoni i UFC-së, rikthimi i shumëpritur i Conor McGregor duket më pranë se kurrë. Presidenti i UFC-së, Dana White, ka konfirmuar se është “jashtëzakonisht i bindur” që irlandezi do të rikthehet në aksion gjatë verës së këtij viti.
McGregor nuk ka zhvilluar asnjë duel që prej vitit 2021, kur pësoi një thyerje të rëndë në këmbë në përballjen trilogji ndaj Dustin Poirier. Që nga ajo kohë, spekulimet për rikthimin e ish-kampionit të dyfishtë kanë qenë të vazhdueshme, por pa asnjë rezultat konkret.
Megjithatë, gjatë një interviste në emisionin e Jim Rome, Dana White dha sinjalet më të forta deri tani për rikthimin e “The Notorious”.
“Jemi në një pozicion shumë të mirë me Conor. Jam jashtëzakonisht i bindur që ai do të luftojë këtë vit. Ai po stërvitet dhe ka shumë gjëra pozitive që po ndodhin prapa skenave”, deklaroi White.
Presidenti i UFC-së shtoi se McGregor duket më i motivuar se kurrë për t’u rikthyer në MMA.
“Ai është duke u përgatitur seriozisht. Kam menduar se do të rikthehej edhe vitin e kaluar, por tani jam shumë i bindur se do ta shohim të luftojë këtë verë”, përfundoi White.
Rikthimi i McGregor pritet të jetë një nga ngjarjet më të mëdha sportive të vitit në UFC, ndërsa tifozët presin me padurim të mësojnë emrin e kundërshtarit të tij të ardhshëm.