Babai i Ervis Martinajt në GJKKO për pasuritë e sekuestruara: “Nuk duan ta zbardhin zhdukjen e djalit tim”
Babai i Ervis Martinajt, Mustafa Martinaj, është paraqitur për herë të dytë në Gjykatën e Posaçme (GJKKO), në kuadër të procesit për konfiskimin e pasurive të lidhura me të birin dhe persona të tjerë të dyshuar.
Çështja lidhet me sekuestrimin e 34 pasurive, të vlerësuara rreth 10 milionë euro, ndërsa seanca u shty për shkak të mungesës së dy avokatëve.
Pas daljes nga gjykata, Mustafa Martinaj deklaroi për mediat se autoritetet nuk kanë bërë përparim në zbardhjen e fatit të djalit të tij, i zhdukur prej rreth tre vitesh.
“Nuk duan ta zbardhin, prandaj e lënë në Kurbin. Ua kam dhënë koordinatat e sakta dhe emra konkretë,” tha ai, duke hedhur akuza edhe ndaj drejtuesve të policisë kriminale ndër vite.
Ai shtoi se ka dhënë dëshminë e tij edhe në SPAK, por sipas tij, nuk është marrë asnjë veprim konkret më pas.
Në tetor të vitit 2025, familja Martinaj kërkoi në Gjykatën e Lezhës që Ervis Martinaj të shpallej zyrtarisht i zhdukur, por ende nuk ka një vendimmarrje për këtë kërkesë. Sipas Prokurorisë së Posaçme, në mungesë të provave të kundërta, ai vijon të konsiderohet ligjërisht i gjallë.
Ervis Martinaj është i kërkuar ndërkombëtarisht nga SPAK, ndërsa ndaj tij janë referuar edhe dëshmi të bashkëpunëtorëve të drejtësisë për përfshirje të dyshuar në ngjarje kriminale.