Bordi i Transparencës ka vendosur një ulje të lehtë të çmimeve të karburanteve në vend, duke reflektuar ndryshime të fundit në treg.
Sipas vendimit më të ri, çmimi i naftës është caktuar në 198 lekë për litër, nga 201 lekë që ishte më parë. Edhe benzina ka pësuar ulje, duke u vendosur në 185 lekë për litër, nga 187 lekë për litër.
Në mbledhjen e datës 15 maj 2026, Bordi i Transparencës përcaktoi se çmimi i shitjes me pakicë i nënproduktit gazoil standard SSH EN 590 do të jetë jo më shumë se 198 lekë/litri, ndërsa çmimi i shitjes me shumicë jo më shumë se 186 lekë/litër.
Për benzinën, çmimi i shitjes me pakicë është caktuar jo më shumë se 185 lekë/litri dhe ai me shumicë jo më shumë se 173 lekë/litër.
Vendimi hyn në fuqi sot në orën 13:00 dhe do të mbetet në fuqi deri në mbledhjen e radhës së Bordit, ku mund të bëhen ndryshime të reja sipas lëvizjeve të tregut.
Autoritetet theksojnë se të gjithë operatorët e tregut janë të detyruar të zbatojnë vendimin, ndërsa në rast shkeljesh parashikohen masa deri në pezullim të aktivitetit.
Në njoftim thuhet gjithashtu se Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë të angazhuara për mbrojtjen e konsumatorëve dhe garantimin e konkurrencës së ndershme në tregun e karburanteve.