Prokuroria e Vlorës ka përfunduar hetimet dhe ka dërguar në gjyq katër ish-zyrtarë të Inspektoratit të Mbrojtjes së Territorit (IMT) në Himarë, si dhe tre shtetas të tjerë, të akuzuar për shpërdorim detyre dhe ndërtim të paligjshëm.
Çështja lidhet me procedimin penal nr. 704 të vitit 2021, që ka në fokus ndërtimet pa leje në zonën e njohur si “Kodra e Rrapojve” në Himarë. Sipas hetimeve, zyrtarët publikë dyshohet se kanë vepruar në kundërshtim me ligjin gjatë ushtrimit të detyrës, duke cenuar interesat e shtetit dhe të subjekteve të tjera.
Në përfundim të hetimeve, Prokuroria pranë Gjykatës së Shkallës së Parë të Juridiksionit të Përgjithshëm Vlorë ka ngritur akuza konkrete për personat e përfshirë.
Tre shtetas, konkretisht M.B., B.M. dhe Sh.T., akuzohen për veprën penale “Ndërtimi i paligjshëm”, e parashikuar nga neni 199/a/4 i Kodit Penal.
Ndërkohë, katër ish-zyrtarë të IMT-së Himarë përballen me akuzën e “Shpërdorimit të detyrës”, sipas nenit 248 të Kodit Penal. Bëhet fjalë për ish-kryeinspektorët R.H. dhe M.N., si dhe inspektorët E.Z. dhe R.K.
Sipas organit të akuzës, këta persona kanë lejuar ose nuk kanë ndërhyrë për të ndaluar ndërtimet e paligjshme, duke shkelur detyrimet ligjore dhe duke favorizuar zhvillime të jashtëligjshme në zonë.
Çështja tashmë pritet të shqyrtohet në gjykatë, ku do të vendoset përfundimisht mbi përgjegjësinë penale të të akuzuarve.