SEANCA PËR DOSJEN “PARTIZANI”: BALLA PËRPLASET ME MALTEZIN NË GJKKO – DEBAT I ASHPËR PËR PRIVATIZIMIN E PRONËS SHTETËRORE
Në Gjykatën e Posaçme Kundër Korrupsionit dhe Krimit të Organizuar (GJKKO) është zhvilluar sot një seancë e tensionuar lidhur me dosjen e njohur “Partizani”, ku dëshmitar ka qenë deputeti i Partisë Socialiste, Taulant Balla, i thirrur nga organi i akuzës.
Gjatë dëshmisë së tij, Balla është përballur drejtpërdrejt me Jamarbër Malltezin, duke shkëmbyer pyetje dhe përgjigje të forta në sallën e gjyqit. Në qendër të debatit kanë qenë pretendimet për mënyrën e privatizimit të kompleksit sportiv “Partizani” dhe procedurat e ndjekura në atë proces.
Prokurori e ka pyetur Ballën në lidhje me kallëzimin penal të bërë në vitin 2020, duke kërkuar të dijë mbi bazën e çfarë të dhënash janë ngritur dyshimet e tij. Deputeti socialist u përgjigj se shqetësimet e tij kanë nisur që në vitin 2012, kur, sipas tij, ka konstatuar parregullsi në mënyrën se si është trajtuar prona shtetërore.
“Prej vitit 2012 kam paraqitur dyshimet e mia mbi mënyrën se si është proceduar me privatizimin e kompleksit ‘Partizani’. Procesi nuk është bërë sipas procedurave ligjore. Janë shfrytëzuar pozicione dhe lidhje,” deklaroi Balla në sallën e gjyqit.
Ai ngriti gjithashtu dyshime për mënyrën e vlerësimit të pronës, duke e cilësuar çmimin e vendosur si të papërshtatshëm dhe jo real. Sipas tij, një nga elementët problematikë ishte edhe shpejtësia me të cilën ishte kryer procesi i njohjes dhe dorëzimit të pronës, që sipas dëshmisë së tij kishte zgjatur vetëm rreth gjashtë muaj.
Në deklarimet e tij, Balla përmendi edhe figura politike të përfshira indirekt në këtë çështje, duke hedhur akuza mbi mënyrën se si është trajtuar prona shtetërore në atë periudhë. Ai u shpreh se kallëzimin e ka bërë në cilësinë e qytetarit, duke theksuar se çdo qytetar ka detyrimin të raportojë dyshimet për vepra penale.
Nga ana tjetër, Jamarbër Malltezi e ka pyetur Ballën për pozicionin e tij në kohën kur është bërë kallëzimi, duke e vënë në fokus rolin e tij institucional dhe politik në atë periudhë. Balla u përgjigj se në momentin e kallëzimit ka qenë deputet dhe kryetar i grupit parlamentar të PS-së, ndërsa firmosjen e ka bërë si qytetar.
Seanca është karakterizuar nga debate të forta mes palëve, ndërsa çështja “Partizani” mbetet një nga dosjet më të bujshme të hetuara nga SPAK, për shkak të akuzave mbi privatizime të dyshuara të parregullta dhe përfitime të paligjshme nga prona shtetërore.
Procesi pritet të vijojë me dëshmi të tjera dhe ballafaqime mes personave të përfshirë, ndërsa vëmendja publike mbetet e lartë për shkak të natyrës së ndjeshme të çështjes dhe emrave të përfshirë në të.