SPAK kërkon burg përjetë për Plaurent Dervishajn për atentatin ndaj ish-prokurorit Arjan Ndoja
Struktura e Posaçme Kundër Korrupsionit dhe Krimit të Organizuar (SPAK) ka kërkuar dënim me burgim të përjetshëm për Plaurent Dervishajn dhe 35 vite burg për Julian Meçen, të akuzuar për atentatin ndaj ish-prokurorit Arjan Ndoja në vitin 2019 pranë mbikalimit të Shkozetit.
Pretenca u lexua në gjykatë nga prokurori Adnan Xholi, në mungesë të të pandehurve.
Sipas kërkesës së SPAK, Plaurent Dervishaj duhet të dënohet me burg përjetë, ndërsa Julian Meçe, i akuzuar si bashkëpunëtor në atentat, me 35 vite heqje lirie.
Ngjarja e rëndë ndodhi më 1 nëntor 2019, pranë mbikalimit të Shkozetit, ku mbeti i vrarë shoferi i ish-prokurorit, ndërsa Arjan Ndoja dhe Aleksandër Laho mbetën të plagosur.