Sot në Gjykatën e Posaçme Kundër Korrupsionit dhe Krimit të Organizuar (GJKKO) po zhvillohet seanca e dytë e gjyqit në themel ndaj kreut të Partisë së Lirisë, Ilir Meta.
Sipas raportimeve të gazetares Klodiana Lala, Meta ka dorëzuar një deklaratë ku bën të ditur se nuk do të marrë pjesë në seancën ku diskutohet masa e sigurisë, por do të jetë i pranishëm në fazën e gjykimit në themel.
Në sallën e gjyqit janë parë edhe disa përfaqësues të opozitës, mes tyre Sekretari i Përgjithshëm i Partisë Demokratike Flamur Noka, Sekretari i Përgjithshëm i Partisë së Lirisë Tedi Blushi dhe deputeti Klevis Balliu.
Në seancën e kaluar, Meta u shfaq për herë të parë pas xhamit mbrojtës që prej arrestimit të tij në tetor 2024. Ai ka kritikuar procesin gjyqësor, duke e cilësuar si “të turpshëm” dhe ka hedhur akuza ndaj sistemit të drejtësisë.
“Nuk jam unë në pozita të pabarabarta, por ata. Është një proces i turpshëm kundër shtetit shqiptar, jo kundër Ilir Metës”, është shprehur ai, duke kërkuar që seancat të transmetohen live për transparencë të plotë.
Meta ndodhet në paraburgim prej tetorit 2024 dhe përballet me akuza për korrupsion, pastrim parash dhe fshehje pasurie.