Dyshime për shpërdorim detyre, AMP çon në Prokurori dy policë në Tiranë
Agjencia e Mbikëqyrjes Policore (Rajoni Tiranë) ka referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë materialet procedurale ndaj dy punonjësve të Policisë së Shtetit, të dyshuar për veprën penale “Shpërdorim i detyrës”.
Hetimi ka nisur pas monitorimit të mediave elektronike, ku janë raportuar dyshime se në një objekt shumëkatësh në ndërtim në rrugën “Llukë Kacaj”, Njësia Administrative nr. 4 në Tiranë, janë ndërtuar dy kate banimi më shumë se sa parashikohej në lejen e ndërtimit të lëshuar nga Bashkia Tiranë.
Pas verifikimeve të kryera nga strukturat e Policisë së Shtetit, është konstatuar se objekti dyshohet të jetë ndërtuar në tejkalim të lejes së ndërtimit, mbi pragun ligjor prej 10% të lejuar për masën e konfiskimit për interes publik, referuar Aktit Normativ Nr. 8, datë 01.10.2025.
AMP ka administruar dokumentacionin përkatës dhe ka marrë deklarime nga strukturat policore të përfshira në rast, duke arritur në përfundimin e referimit të çështjes për hetim të mëtejshëm.
Dy punonjësit e policisë të përfshirë në procedim janë:
K. M., me detyrë Ndihmës Specialist për Hetimin e Krimit pranë Komisariatit të Policisë Nr. 4 në Tiranë
S. K., me detyrë Specialist për Hetimin e Krimit pranë Komisariatit të Policisë Nr. 4 në Tiranë
Hetimet vijojnë për dokumentimin e plotë të rrethanave të ngjarjes dhe përcaktimin e përgjegjësive ligjore.