“Na kalbet malli”, fermerët e Divjakës nxjerrin në treg pataten dhe qepën e hershme
Fermerët e zonës bregdetare të Divjakës kanë nisur këto ditë vjeljen dhe tregtimin e patates dhe qepës së hershme, por thonë se çmimet aktuale nuk mbulojnë kostot e prodhimit. Aktualisht, qepa po shitet nga 35 deri në 50 lekë për kilogram, ndërsa patatja nga 40 deri në 50 lekë, në varësi të cilësisë.
Sipas fermerëve, moti i paqëndrueshëm ka ndikuar ndjeshëm në rendimentin e këtij viti, ndërsa konkurrenca nga importet po ua vështirëson edhe më shumë shitjen e prodhimit vendas.
“Nuk na leverdis me çmim 50 lekë për kilogram. Tregu i brendshëm ka probleme”, shprehet fermeri Asbi Shuli nga fshati Mizë.
Edhe fermerja Sherife Shuli thotë se prodhimi këtë vit ka qenë shumë më i ulët. “Prodhimi është gjysmë për gjysmë. Faji është i plehrave dhe farërave të skaduara. Na konkurron dhe malli që vjen nga jashtë me çmim më të lirë. Ne nuk marrim as subvencione”, deklaron ajo.
Të njëjtin shqetësim kanë edhe kultivuesit e patates, të cilët përballen me stokun e pashitur të prodhimit të vjetër, ndërkohë që ka dalë në treg edhe prodhimi i ri.
“Këtu ka fermerë që kanë ende qindra kuintalë patate të pashitura nga vjeshta. Ndërkohë po hyn mall nga jashtë me çmime më të ulëta”, thotë fermeri Xhevdet Taragjini nga fshati Zharrnec.
Sipas tyre, shumica e prodhimit blihet nga tregtarë që shkojnë direkt në parcela, por pa lëshuar fatura tatimore, çka u pamundëson fermerëve përfitimin e subvencioneve.
“Vijnë tregtarët dhe e marrin mallin me makinat e tyre, por nuk na japin fatura. Jemi të detyuar ta shesim se na kalbet malli”, shprehen fermerët.
Zona përgjatë lagunës së Divjakës, në fshatrat Mizë, Xeng dhe Zharrnec, njihet për prodhimin e hershëm të patates dhe qepës, duke furnizuar jo vetëm tregun vendas, por edhe tregjet e rajonit.