4 vite nga ndarja nga jeta e Kastriot Myftarajt, si u mbyll me shpejtësi dosja duke lënë dëshmitarë dhe prova të rëndësishme jashtë hetimit
Më 7 korrik 2022, pra 4 vite më parë Policia e Shtetit njoftoi se analisti dhe gazetari investigativ Kastriot Myftaraj, u vetëvra duke u hedhur nga kati i katërt i pallatit. Dosja për të u mbyll me shpejtësi dhe u klasifikua “Vetëvrasje”, pa i hetuar shkaqet dhe rrethanat e hedhjes nga lartësia e banesës, sepse dhe hetimi për të nuk u krye me dyshimin “vrasje”, megjithëse kishte indicie e prova për një akt të tillë. Sipas dosjes hetimore, gazetari Myftaraj kishte zbuluar se vuante nga një sëmundje e rëndë në tiroide, e cila ishte përhapur dhe në pjesën e trurit.
Për shkak të kësaj sëmundje, gazetari Myftaraj ka pasur momente debulese dhe marrje mendsh, duke u rrëzuar edhe në ambientet e brendshme të shtëpisë. Këto të dhëna kanë dalë nga dëshmia e nënës së gazetarit, e cila në rrëfimin e dhënë në prokurori, ka shpjeguar gjendjen shëndetësore të djalit dhe simptomat që i jepte sëmundja.
Nëna e gazetarit, ka pohuar se ditën kur ka ndodhur ngjarja ajo ndodhej brenda banesës së bashku me djalin e saj. Kur papritur, teksa Kastrioti ndodhej në dritare, ka vërejtur se ai nuk ishte më aty. Dhe pak çaste më pas, ka vënë re shumë persona poshtë pallatit dhe trupin e Kastriotit në trotuar. Në konkluzionin për pushimin e hetimeve, prokuroria sqaron se nuk ka pasur asnjë faktor të jashtëm që ka ndikuar në shkaktimin e vetëvrasjes së gazetarit, Kastriot Myftaraj.
Dëshmitë e miqve
Miku familjar i gazetarit të ndjerë Kastriot Myftaraj, avokati Kastriot Frashëri, deklaroi në media se policia, prokuroria dhe gjykata që pushoi çështjen si “vetëvrasje” lanë jashtë hetimit prova të rëndësishme. Për gazetën “SOT”, Frashëri ka thënë se: “Unë jam një mik i tij dhe nga ana tjetër jam dhe një profesionist i ligjit pasi jam avokat. Unë kam parë nga tërësia e dinamikës së ngjarjes si ndodhi, nga rrethanat e vendit ku ndodhi dhe sot pas dy vitesh vijon të ngjall debate si çështje.
Shpesh ende më thonë njerëz që i takoj më thotë se nuk na besohet si ngjarje, as mua e as nënës së tij. Unë në cilësinë e avokatit dhe mikut të tij, kam parë dosjen e hetimit të bërë nga ana e policisë, e cila shkoi në Prokurori, por disa gjëra aty çedonin dhe pse kam parë që aty ka patur një punë jo disi profesionale, por ajo që nuk më ka pëlqyer ka të bëj me cilësinë e dobët profesionale të Policisë Gjyqësore, që janë hetimet paraprake ku merren deklarata të paqarta ose mungonin, duke lënë shtigje e si e tillë duke mos dhënë një tablo apo një imazh të qartë të asaj që ka ndodhur.Dhe nga ana e Policisë Gjyqësore, dëshmitë që janë marrë nga dëshmitarët okular, janë pyetje të thata ku janë marrë vetëm përgjigje me po ose jo, duke mos u thelluar më tej. Gjatë kohës së hetimit unë nuk mund të isha avokat i tij, por nga hetimet rezulton se vrasja nuk mund të ketë ndodhur nga persona të tretë e si e tillë e çoi në Prokurori për ta mbyllur si çështje. Unë dhashë një deklaratë para Oficerit të Policisë Gjyqësore për momentet e para që kam mbërritur në banesën e tij apo bisedat e fundit, e si e tillë nuk mund të isha avokati i familjes së tij. Ndaj u zgjodh një tjetër avokat e nga ana tjetër dhe nëna e tij nuk kishte më fuqi që ta ndiqte më si çështje.
Sakaq, nëna e tij vijon të ketë dyshime të tjera në lidhje me këtë çështje duke ia atribuuar për një shokun e Kastriotit, i cili rrinte shpesh me të. E ëma dyshon se ai mund t’i ketë dhënë ndonjë gjë për të pirë, sepse thotë se ka ardhur nga një drekë me të, fill një javë pasi të jepte shenjat e para të sëmundjes si të fikët e më pas e dërguam në spital. E nga ana tjetër u bë ekzaminimi, ku Kastrioti ma ka thënë vetë informacionin ku Policia i ka kërkuar spitalit fletën e kartelës së tij.
Por dhe vetë Kastrioti më tha që në skaner janë identifikuar dy masa tumorale në kokë. Por për ta përcaktuar këtë, ai u bë gati madje që të hynte në sallën e operacionit, por në një moment i thirri mendjes dhe iu kishte thënë mjekëve se unë si mund të futem në sallë operimi pa patur një biopsi të kësaj mase dhe nuk hyri në operim”, tha ai. Frashëri tha se kur ka parë materialin hetimor ka ngritur disa pikëpyetje. “Unë kam patur fatin të njihem me materialin hetimor, por ka disa pikëpyetje që kanë të bëjnë me çështjen që mund ta lidh me Kastriotit por ka të bëj me të gjitha aspektin kombëtar që aspekti i hetimit lë për të dëshiruar.
Nga aktet hetimore që janë bërë nga Policia, janë bërë pyetje të mira dhe profesionale drejtuar institucioneve të ndryshme. Ndërsa pjesë të tjera që kanë të bëjnë me veprimtarinë e oficerit të Policisë Gjyqësore, lënë shumë për të dëshiruar, siç kundër dhe e thash që është pyetur një dëshmitar okular por me pyetje shumë të thata e jo të thelluara. Por ndërkohë mua më dukej e pamundur që Kastrioti të hidhej nga ballkoni nga një hapësirë aq e ngushtë. Por gjëja që më preu shpresat ishte kur pyeta një mjek të huaj për sëmundjen e më tha në rastet kur ka politraum (hedhja nga lartësitë), është e pamundur që akti i ekspertimit të vërtetojë të kundërtën.
E mjeku më tha që si e tillë nuk mund të gjesh aktin e ekspertimit e si e tillë nuk ke si të nxjerrësh të dhëna e fakte pasi nuk ke asnjë lloj analize e ekspertët nuk kanë si të dalin në një përfundim. Por mjeku thekson se nga një politraumë nuk mund të thuash që të gjenden goditje apo shenja të tjera për të arritur në një konkluzion vlerësimi”, tha ai. I pyetur se çfarë veprimesh konkrete ka kërkuar nga organet kompetente për të siguruar që kjo çështje të hetohet në mënyrë të drejtë dhe të plotë, Kastriot Frashëri tha: “Unë këtë e bëra që në fillim, në momentin kur dhashë një deklaratë të oficeri i Policisë Gjyqësore ku dhe i orientova për hetimin se ku duhet të konsistonte krahas hetimeve të Policisë, që janë aspekte të cilat i ndihmojnë në rrethana se ku mundesh ta gjesh provën.Unë jam interesuar për të marrë fashikullin e dosjes së hetimit dhe ia vura në dispozicion familjes, nënës së tij për ta parë çështjen hetimore. Këtu mbaron roli im pasi nuk mund të jem avokati mbrojtës i familjes. Më pas i rekomandova nënës së Kastriotit që duhet gjetur një tjetër avokat dhe çështjen e mori një i njohur i Kastriotit, avokati Arben Llangozi. Por ndërkohë kam dhe disa pyetje që nuk iu gjej dot përgjigje si dhe nga ana e nënës së tij më janë thënë që Kastrioti ka bërë disa lëvizje që mund të çoj në një planifikim, ku dhe i kam rekomanduar që të bënte scanpet, ekzaminim me et/ct në Turqi apo në Maqedoni e më tha që këto ekzaminime do i bëj jashtë shteti.
Ndërkohë nëna e tij më thotë që Kastrioti kishte tërhequr disa para dhe i kishte lënë te motra e tij pasi i kishte thënë që janë për nënën e tij që të kujdesej gjatë kohës që ai do të ishte jashtë shtetit. Kjo tregon si një lloj parapërgatitje nga ana e Kastriotit dhe nga ana tjetër dha sigurinë që do e bënte scan pet/ct e nuk kishte as problemin financiar.”
Telefonata e fundit
Myftaraj po priste dikë pak minuta pasi u hodh apo e hodhën nga ballkoni. Ai ishte bërë gati dhe kishte folur me dikë në telefon. Në dritaren ku pretendohet se është hedhur Mytaraj janë konstatuar jo një, por dy shenja gishtash, sot ende të paidentifikuar se kujt i përkasin. Nga ana tjetër, të gjithë miqtë e tij kanë konfirmuar se Myftaraj nuk ka patur asnjë shenjë depresive, madje ishte më aktiv se kurrë, përfshirë edhe në rrjetet sociale. Sëmundja e tij nuk ishte e rëndë dhe sipas mjekëve ishte plotësisht e shërueshme.
Dyshimet e Cakos dhe historianit
Gjithashtu deklaratat e fundit të konspiracionistit Alfred Cako, kanë hedhur sërish benzinë mbi këtë debat, duke rikthyer në vëmendje detaje të pazbardhura dhe rrethana që, sipas tij, nuk përputhen plotësisht me narrativën zyrtare. “Nuk jam i qartë, po dyshoj. Dyshoj sepse kur hyri policia në shtëpinë e tij, derën e gjeti hapur. Unë e di se ka qenë miku im, unë e kam ndihmuar që ka ardhur edhe në Tiranë mbas vitit ’97 dhe kemi pasur shumë miqësi bashkë. Megjithëse pastaj në fund u ftohëm pak, por unë kam marrë pjesë në varrimin e tij, në të gjitha ato përkujtimet që janë bërë nga familja.Në fund patëm divergjenca sepse Kastrioti e humbi pak koherencën në lidhje me çështje të gjeopolitikës, sidomos me politikën e Izraelit. Nuk ishte i paanshëm siç jam përpjekur unë të jem për të treguar të vërtetën. Unë nuk jam antisemit, por nuk jam as kundër myslimanëve, nuk jam as kundër të krishterëve, të gjithë i dua dhe përpiqem që të kem në ato që flas të vërtetën si fe mbi fe. Kastrioti nuk ishte koherent; në fillim thoshte “do të djeg flamurin e Izraelit para universitetit kur të vijë ministri i jashtëm”. Unë gjëra të këtilla s’i kam thënë kurrë dhe s’i bëj kurrë.
Pastaj kur erdhi fjala në një bisedë që kemi qenë te Artur Zheji, te “360 Gradë”, kur unë po flisja mbi disa ngjarje në Lindjen e Mesme, për disa masakra që kishte bërë Izraeli dhe kur unë thashë që ka pikësynim të bëhet “Izraeli i Madh”, ai mu sul në një mënyrë të egër dhe tha “ti antisemit”, gjëra të tilla që nuk janë të vërteta. Unë mendoj që edhe mund ta kenë vrarë, sepse rrethanat kanë qenë kështu: unë kam pyetur nënën e vet çfarë ka ndodhur, dhe ky i ka thënë mamasë “hyr brenda në dhomë sepse po pres të vijnë disa njerëz për të biseduar, kam një bisedë me ta”. E ëma ka hyrë në dhomë dhe vetëm kur ka ardhur policia, pas nja 45 minutave që kishte ndodhur vdekja e tij. Unë kam ato dyshimet e mia se kush, në qoftë se është vrasje, kush mund t’ia ketë bërë, por nuk mund ta them dot”, u shpreh Alfred Cako.
Denoncimi në polici
Disa javë më parë, gazeta “SOT” raportoi denoncimin publik të historianit dhe analistit Olsi Jazexhi, i cili tha se është kërcënuar me jetë nga një person që përdor pseudonimin “Ken Shiro” në rrjetet sociale dhe aplikacionet e komunikimit që sipas tij ka deklaruar gjithashtu se ka lidhje me vrasjen e të ndjerit Kastriot Myftaraj. Sipas Jazexhit, personi në fjalë i ka dërguar mesazhe kërcënuese, ku shprehet se do ta qëllojë “me dy plumba”, duke e paraqitur këtë si një premtim të drejtpërdrejtë. Jazexhi ka bërë të ditur se ka paraqitur kallëzim penal në Policinë e Shtetit, duke kërkuar identifikimin dhe ndalimin e personit që e kërcënon.
Më tej, ai ka deklaruar se personi në fjalë është parë rreth orës 12:45 në parkingun e Partisë Demokratike, pranë Xhamisë së Namazgjasë. Sipas tij, kamerat e sigurisë së Partisë Demokratike mund ta kenë regjistruar këtë individ, i cili dyshohet se lëviz i armatosur në Tiranë dhe vijon ta kërcënojë me vrasje. “Njoftim për Policinë e Shtetit. Një person me pseudonimin “Ken Shiro”, që pretendon se ka vrarë Kastriot Myftarajn, më kërcënon me vrasje.
Do të bëj kallëzim në polici për personin me pseudonimin “Ken Shiro” dhe shpresoj që policia ta identifikojë këtë person që më kërcënon me dy plumba dhe pretendon se ka vrarë edhe Kastriot Myftarajn. Personi në fjalë, në orën 12:45, ka qenë në parkingun e Partisë Demokratike, pranë Xhamisë së Namazgjasë. Kamerat e PD-së mund ta kenë kapur personin në fjalë, i cili duket se lëviz i armatosur në Tiranë dhe më kërcënon me vrasje me plumba”, u shpreh në një reagim të fundit Jazexhi.