Agjencia Shtetërore e Kadastrës është kthyer në institucionin më problematik sa i takon bashkëpunimit me Avokatin e Popullit. Deklarata u bë dje nga Avokati i Popullit, Endrit Shabani, gjatë raportimit në Kuvend përpara Komisionit për Nismat Qytetare, Bashkëpunimin dhe Mbikëqyrjen Institucionale. Shabani bëri të ditur se një pjesë e institucioneve publike vijojnë të mos japin informacion, të mos kthejnë përgjigje dhe të mos zbatojnë rekomandimet e këtij institucioni. Sipas tij, niveli i zbatimit të rekomandimeve të Avokatit të Popullit është vetëm 21 për qind, një shifër që ai e cilësoi të papranueshme.
Në raportimin e tij, ai veçoi Kadastrën që drejtohet nga Lorena Goxhobelli si institucionin që refuzon më shpesh të zbatojë rekomandimet e dhëna. “Zbatimi i rekomandimeve të Avokatit të Popullit është gati 21 %, një shifër e ulët për të cilën nuk jam i kënaqur dhe kërkoj ndihmën e këtij Komisioni dhe të Kuvendit që kjo të ndryshojë. Institucioni më problematik që refuzon të zbatojë rekomandimet tona është Agjencia Shtetërore e Kadastrës. Ndërkohë, nga pushteti lokal, bashkia Përrenjas dhe ajo e Tiranës janë më pak bashkëpunuese”, tha dje ndër të tjera z. Shabani.
KLSH godet Goxhobellin
Por ndërkohë që Brukseli zyrtar ka vendosur si kusht thelbësor për integrimin e Shqipërinë në Bashkimi Europian rritjen e transparencës dhe luftë të vendosur kundër korrupsionit në çështjen e pronave, Agjencia Shtetërore e Kadastrës, gjatë dy viteve të fundit që drejtohet nga Lorena Goxhobelli, është shndërruar në një institucion-bunker. Kryetari i Kontrollit të Lartë të Shtetit (KLSH), Arben Shehu, gjatë një raportimi të zhvilluar në Komisionin Parlamentar të Ekonomisë, kërkoi ndërhyrjen urgjente të Kuvendit të Shqipërisë që të krijojë aksesin për të kryer kontroll pranë Agjencisë së Kadastrës. Ai deklaroi se “KLSH nuk ka asnjë lloj aksesi me ASHK dhe nuk mund të shtrohet aspak për diskutim marrëdhëniet ndërinstitucionale”.
Duke rikujtuar se “regjistrimi i pronave duhet të ketë transparencë të plotë dhe çdo qytetari duhet t’i vihet në dispozicion çdo informacion i detajuar”, Shehu theksoi se “nuk kemi arritur të marrim akses as minimal në të dhënat e këtij institucioni”. Kreu i Kontrollit të Lartë të Shtetit kërkoi sërish ndërhyrjen e Parlamentit për të sjellë situatën në shinat e normalitetit, pasi prej gati dy vitesh Agjencia Shtetërore e Kadastrës ka bllokuar çdo lloj komunikimi dhe bashkëpunimi me institucionin më të lartë kushtetues të Auditimit në Shqipëri.
“Problematika e pronës në Shqipëri ka një rëndësi thelbësore dhe KLSH-ja ka kryer të gjitha veprimet për procese audituese të plota, por është hasur në këtë lloj pengese prej një kohe të gjatë. Do të ishte e vlefshme qe të na mbështesni në realizimin e këtyre proceseve”, iu drejtuar Arben Shehu deputetëve të të gjithë kaheve politike në Komisionin Parlamentar të Ekonomisë.Kreu i KLSH-së deklaroi në seancën dëgjimore se janë bërë disa kallëzime për çështjet që lidhen me Agjencinë e Kadastrës. Megjithatë, për Shehun, zgjidhja duhet të jetë shumë e gjerë se sa rastet penale.“E theksoj dhe njëherë rëndësinë thelbësore që ka monitorimi i punës në drejtimin e regjistrimeve, duke filluar nga prona shtetërore, e cila nëse mbetet e paregjistruar është në një nivel risku shumë të lartë. Por edhe prona private të secilit nga qytetarët, konform detyrimeve ligjore duhet të kenë procese të rregullta të regjistrimit, dhe qytetarët të kenë akses dhe informacion se çfarë bëhet me pronat private”, deklaroi kryekontrollori shtetëror, Shehu.
Situata bllokuese, sipas asaj që u diskutua në Komisionin e Ekonomisë, po zhvillohet prej mëse dy vjetësh, periudhë kohore që përkon me drejtimin e Agjencisë Shtetërore të Kadastrës nga Lorena Goxhobelli. Përgjatë kësaj periudhë, janë shtuar ndjeshëm problematikat dhe akuzat publike, por jo vetëm, lidhur me çështjet e pronësisë, sidomos në zonat bregdetare. Gjatë kësaj periudhe, vetëm në Kadastrën e Vlorës janë ndërruar të paktën 10 titullarë, të cilët jepnin dorëheqjen pasi qëndronin vetëm pak ditë apo javë në detyrë. Aktualisht, Tiranë, por edhe qytete të tjera, janë përfshirë nga protestat qytetarë, të cilat në gjenezën e tyre kishin pikërisht dyshimet mbi tjetërsimet kriminale të pronave në bregdetin e Vlorës.