Një ligj i ri për Bankën e Shqipërisë, i hedhur për konsultim publik nga Ministria e Financave, synon të modernizojë funksionimin e bankës qendrore dhe ta afrojë atë me standardet e Bashkimit Europian.
Ndryshimi më i rëndësishëm është forcimi i pavarësisë së institucionit.“Projektligji synon të garantojë pavarësinë institucionale, funksionale, financiare dhe personale të Bankës së Shqipërisë.
Ai përcakton qartë ndalimin e kërkimit ose marrjes së udhëzimeve nga institucione apo subjekte të tjera, duke forcuar garancitë ligjore për vendimmarrje të pavarur dhe në përputhje me standardet e Bashkimit Europian.”
Një tjetër risi lidhet me stabilitetin financiar. Për herë të parë, projektligji i dedikon një kapitull të veçantë rolit të Bankës së Shqipërisë në monitorimin e rreziqeve që mund të cenojnë sistemin financiar.
Gjithashtu, zgjerohen kompetencat për inspektimin e bankave, mbledhjen e informacionit dhe marrjen e masave administrative kur evidentohen probleme.
“Një nga elementet më të rëndësishme të projektligjit është ndalimi i financimit monetar të sektorit publik.
Banka e Shqipërisë nuk mund të japë kredi, overdraft apo forma të tjera financimi për qeverinë dhe institucionet publike, si dhe nuk mund të blejë drejtpërdrejt borxhin e tyre, duke garantuar disiplinën fiskale dhe pavarësinë e politikës monetare.”
Në tërësi, projektligji synon të krijojë një bankë qendrore më të pavarur, me rregulla më të forta qeverisjeje dhe kompetenca të zgjeruara për ruajtjen e stabilitetit financiar, si pjesë e përgatitjeve të Shqipërisë për anëtarësimin në Bashkimin Europian.