Shqipëria ka paraqitur zyrtarisht kërkesën për ekstradimin nga Franca të biznesmenit Ermal Beqiri, i cili u arrestua javën e kaluar pasi u ndalua për fluturim me avion mbi zonën e ndaluar pranë centralit bërthamor të Penly. Sipas mediave franceze, procedura e ekstradimit mund të zgjasë disa javë për shkak të hapave ligjorë që duhet të ndiqen.
Beqiri u ndalua në aeroportin e Albertit, në veri të Francës, pasi avioni i tij kaloi mbi një zonë strategjike të kufizuar. Ai u gjykua me procedurë të përshpejtuar në Amiens dhe u shpall fajtor për shkeljen e rregullave të hapësirës ajrore, duke u dënuar me 7 mijë euro gjobë. Pas vendimit, ai vijoi të mbahet nën masën e arrestit për shkak të procedurës së ekstradimit drejt Shqipërisë.
Biznesmeni shqiptar është nën hetim nga SPAK që prej vitit 2025 për një dosje që lidhet me dyshime për mashtrim, korrupsion dhe tendera të manipuluar me vlera të konsiderueshme.
Sipas hetimeve, autoritetet shqiptare kanë identifikuar pasuri që dyshohet se lidhen me aktivitet kriminal, përfshirë llogari bankare mbi 2 milionë euro, prona, automjete, avion turistik dhe një kështjellë në Francë, ndërsa dy vendet po bashkëpunojnë për verifikimin e tyre.