BE është bekim për ne”, Rama: Procesi i zgjerimit ka ndryshuar pas agresionit rus në Ukrainë
Kryeministri Edi Rama e ka cilësuar Bashkimin Europian si një “bekim” për Shqipërinë dhe vendet e rajonit, duke theksuar rolin e tij në ndërtimin e institucioneve dhe zhvillimin demokratik.
Në një intervistë për ish-ambasadorin italian në Tiranë, Fabrizio Bucci, e publikuar nga agjencia italiane ANSA, Rama u shpreh se metoda e zgjerimit të BE-së është e ngadaltë, por efektive.
Sipas tij, agresioni rus në Ukrainë ka ndryshuar qasjen e Brukselit ndaj procesit të zgjerimit, duke e bërë atë më të vetëdijshëm për rreziqet që vijnë nga jashtë bllokut europian.
“BE-ja është një bekim për ne; roli i saj është shumë i dobishëm për ndërtimin e institucioneve dhe ajo di si ta bëjë këtë. Është procesi më neurotik i mundshëm, por funksionon. Falë kësaj, ne kemi ndryshuar. Më parë, ata thoshin fjalët e duhura, por veprimet nuk pasonin. Kur erdhi pushtimi, ata kuptuan se të gjitha palët jashtë bllokut mund të humbnin”, u shpreh Rama.
Kryeministri theksoi gjithashtu se Shqipëria vijon punën për integrimin në Bashkimin Europian.
“Ne duhet të bëjmë atë që duhet të bëjmë dhe do të ecim përpara, sepse kështu përmirësohemi”, shtoi ai.
Me nota humori, Rama u shpreh se Shqipëria nuk mund të krahasohet me vende të mëdha europiane:
“Lajmi i mirë është se nuk do të bëhemi kurrë Gjermani, sepse nuk jemi të aftë për të. Por një ‘Itali e vogël’?”
Gjatë intervistës, kryeministri ritheksoi objektivin e Shqipërisë për anëtarësim në Bashkimin Europian deri në vitin 2030.