Deputetja e pavarur Marjana Koçeku, ka reaguar me ironi ndaj deklaratave të deputetit socialist Erion Braçe, i cili kishte ngritur më herët pyetje nëse “Neomalsore Agroturizëm”, i lidhur me Koçekun, dispononte certifikatë pronësie për tokën ku ushtron aktivitetin.
Në një reagim në rrjetet sociale, Koçeku deklaroi se familja e saj prej tre brezash jeton në atë zonë pa dokumente pronësie.Më tej ka pyetur me ironi deputetin nëse për këtë situatë është përgjegjës mungesa e vullnetit prindërve të saj dhe banorëve të atyre zonave apo e vetë shtetit për të zgjidhur problematikat e pronësisë.“Jo, zoti Braçe, nuk i kam letrat.
Nëna ime ka ardhur vajzë aty, është bërë nënë dhe është bërë gjyshe. Ka tre breza aty dhe zero dokumente. Që nga Ramiz Alia, te Shaban Tapia e sot te Erjon Llafia.Pra, më thuaj ti mua: a u ka munguar vullneti prindërve të mi dhe banorëve të atyre zonave, apo i ka munguar vullneti shtetit? Ma shpjego ti mua, që e ke në legjislaturë pothuajse aq sa unë kam vite jetë“, u shpreh Koçeku.