MREKULLI NË DURRËS! I PASTREHU QË U KONSIDERUA PA SHENJA JETE, RIKTHEHET PULSI NË MORG
Aty ku gjithçka dukej se kishte marrë fund, ndodhi një situatë e pabesueshme.
Një person i pastrehë, i cili ishte gjetur pranë Portit të Ri të Peshkimit në Durrës dhe ishte konstatuar pa shenja jete, u transportua drejt morgut. Por ajo që ndodhi më pas tronditi të gjithë.
Në morg u konstatua se personi kishte ende puls.
Sipas informacioneve të bëra publike, dy ditë më parë një ambulancë dyshohet se e kishte lënë të pastrehun në territorin e Portit të Ri të Peshkimit. Personi ishte lënë rreth 20 metra larg detit, brenda hapësirës së portit.
Hyrja në këtë zonë nuk është e lirë për këdo. Për të kaluar në territorin e portit kërkohet autorizim dhe kontrolli përmes traut të sigurisë. Kjo ngre pikëpyetje të forta mbi mënyrën se si personi përfundoi aty dhe mbi përgjegjësinë e institucioneve që u përfshinë në transportimin e tij.
Situata mori një tjetër kthesë kur personi, pasi ishte marrë për të vdekur, u dërgua në morg dhe aty u konstatua se ishte ende gjallë.
Ai u rikthye menjëherë në spital, ku gjendja e tij rezultoi tepër e rënduar. Për shkak të komplikacioneve serioze shëndetësore, mjekët u detyruan t’i amputonin njërën këmbë.
Ngjarja ngre një sërë pyetjesh shqetësuese.
Si mund të përfundojë një njeri në një port, pasi dyshohet se është transportuar nga një ambulancë, dhe më pas të konsiderohet pa shenja jete? Si u përcaktua se ai kishte ndërruar jetë? Dhe mbi të gjitha, pse nuk u dërgua menjëherë në spital për trajtim, nëse gjendja e tij ishte kaq e rënduar?
Rasti tashmë kërkon sqarime të plota nga institucionet përgjegjëse, pasi bëhet fjalë për një seri rrethanash të rënda që mund të kenë pasoja serioze për jetën e një personi.
Ajo që dukej si një histori tragjike e përfunduar në morg, mori një kthesë të papritur: pulsin e kishte ende.
Tani mbetet për t’u zbardhur se çfarë ndodhi realisht në ato orë dhe kush mban përgjegjësi për mënyrën se si u trajtua rasti.