Zvërneci “ndez” edhe Amerikën/ Senatori amerikan: Shqiptarët kundër resortit, i përgjigjet Balla.…
Një reagim i senatorit amerikan Bernie Sanders për protestat kundër projektit turistik të lidhur me dhëndrin e Donald Trump, ka nxitur një përgjigje të drejtpërdrejtë nga sekretari i Përgjithshëm i Partisë Socialiste, Taulant Balla.
Sanders deklaroi se mbi 100 mijë shqiptarë kanë dalë në rrugë kundër resortit të planifikuar nga Jared Kushner dhe partnerët e tij, duke e cilësuar rastin si një shembull të “oligarkisë globale”.
Pas kësaj deklarate, Balla reagoi me një letër publike, ku kundërshtoi shifrat e përmendura nga senatori amerikan. Sipas tij, në protestën e fundit morën pjesë rreth 2 mijë persona dhe jo 100 mijë, ndërsa shtoi se projekti në fjalë ndodhet ende në fazën e projektimit dhe nuk është miratuar.
Në reagimin e tij, Balla theksoi se projekti parashikohet të zhvillohet në tokë private dhe e cilësoi atë si një mundësi të rëndësishme për zhvillimin e turizmit dhe ekonomisë shqiptare.Ai i kërkoi gjithashtu Sanders të mos e përdorë Shqipërinë si pjesë të debateve politike të brendshme në Shtetet e Bashkuara, duke nënvizuar marrëdhëniet strategjike mes dy vendeve dhe duke e ftuar senatorin të vizitojë Shqipërinë.
Debati vjen në një moment kur projekti i propozuar në Zvërnec vijon të shkaktojë diskutime të forta politike dhe publike, ndërsa protestat kundër tij kanë tërhequr vëmendje edhe jashtë vendit.
Mesazhi i plotë i Ballës:
I dashur Senator Sanders,Çdo ditë vërej se sa shumë përplasen palët në politikën amerikane, ashtu siç ndodh edhe këtu në Europë dhe në Shqipëri. Në fund të fundit, duket sikur kudo politika ngjan me një “shtëpi letrash”.
Sigurisht që ju keni të drejtën të shprehni mendime për çështje që lidhen me vende të tjera, por duke qenë se Shqipëria dhe Shtetet e Bashkuara janë aleate në NATO dhe gëzojnë një partneritet strategjik të veçantë mendoj se do të ishte e udhës që fillimisht të verifikoheshin faktet reale.
Së pari, në protestën e djeshme morën pjesë rreth 2 mijë persona, jo 100 mijë siç është pretenduar. Kjo shifër është rreth 50 herë më e vogël. Gjithashtu, pati një përfshirje të konsiderueshme të fushatave të dezinformimit, përfshirë elementë të lidhur me interesa iraniane dhe aktorë të tjerë keqdashës, si edhe shumë mesazhe me përmbajtje antisemite. Në fakt, e gjithë kjo nisi nga një fushatë me tone antisemite.
Së dyti, sa i përket projektit në fjalë, bëhet fjalë për një projekt të konceptuar me standarde të larta të mbrojtjes së natyrës, i cili aktualisht ndodhet ende në fazën e projektimit. Ai parashikohet të zhvillohet tërësisht në tokë private.
Senator, unë jam një socialist i bindur, ashtu si edhe ju, por njëkohësisht respektoj fort rregullat e ekonomisë së tregut dhe të kapitalizmit. Për më tepër, nga sa duket, jeni informuar gabim: deri më sot nuk ka asnjë projekt të miratuar. Sapo projekti të bëhet publik dhe të prezantohet zyrtarisht, do të kem kënaqësinë t’jua përcjell edhe juve.Shqipëria ka nevojë për investime të tilla.
Ky projekt mund të na ndihmojë ta çojë vendin tonë në një nivel të ri europian dhe global në fushën e turizmit. Ne kemi nevojë për këtë zhvillim.Tre të pestat e shqiptarëve na kanë besuar votën ne socialistëve shokëve tuaj politikë, për të zhvilluar fuqishëm vendin tonë dhe për të përmirësuar mirëqenien e qytetarëve tanë.
Prandaj, ju lutem, mos e përdorni Shqipërinë si një mjet në debatet e politikës së brendshme amerikane apo si një mënyrë për të goditur kundërshtarët tuaj politikë në vend. Për shumë prej nesh, situata aktuale ngjan disi me filmin “Wag the Dog”, të cilin besoj se e keni parë.
Ndërkohë, ju lutem pranoni edhe ftesën time për të vizituar Shqipërinë, vendin tonë të bukur dhe ndoshta vendin më pro-amerikan në Europë, pavarësisht se kush ndodhet në pushtet në Uashington republikanët apo demokratët.
Shpresoj sinqerisht që ta pranoni këtë ftesë, të cilën do t’jua dërgoj edhe zyrtarisht.
Gëzuar 250-vjetorin e Pavarësisë së Shteteve të Bashkuara të Amerikës!