Salarjon Totaj, bashkëshorti i ministres Elisa Spiropali, është vënë nën hetim nga Policia e Tiranës pasi ka kanosur me mesazhe një punonjëse të Drejtorisë Tatimore.
Gjatë dëshmisë së tij, ai ka pranuar se ka komunikuar përmes mesazheve me punonjësen e Tatimeve, ndërsa autoritetet po verifikojnë përmbajtjen e këtyre komunikimeve dhe rrethanat e ngjarjes.
Çështja lidhet me një kontroll tatimor të zhvilluar në biznesin e motrës së Totajt në Fier.
Pas këtij kontrolli, dyshohet se ka pasur komunikime mes palëve, të cilat tashmë janë pjesë e verifikimeve hetimore.
Organi i akuzës po administron prova dhe dëshmi për të sqaruar situatën, ndërsa hetimet vijojnë për të përcaktuar nëse ka elementë të veprës penale të kanosjes.
Deri në këtë fazë, autoritetet nuk kanë bërë të ditura detaje të tjera mbi përmbajtjen e mesazheve apo përfundimet e hetimit.