Presidenti i Ukrainës, Volodymyr Zelensky, deklaroi se gjatë takimit me presidentin amerikan Donald Trump diskutoi mundësinë e licencimit të prodhimit të raketave për sistemin e mbrojtjes ajrore Patriot në Ukrainë.
Vizita e Zelenskyt në Shtëpinë e Bardhë vjen në një moment kritik për Kievin, teksa vendi vijon të përballet me sulme të vazhdueshme ajrore nga Rusia. Një nga objektivat kryesorë të presidentit ukrainas ishte sigurimi i mbështetjes amerikane për prodhimin me licencë të sistemeve Patriot në Ukrainë, një ide që, sipas tij, Trump e kishte mbështetur edhe gjatë samitit të NATO‑s.
Pas takimit, Zelensky tha se, përveç prodhimit të raketave Patriot, u diskutuan edhe iniciativa të tjera që mund të forcojnë mbrojtjen e Ukrainës.
“Folëm për licencimin e prodhimit të raketave Patriot, si edhe për ide të tjera që mund të jenë të dobishme. Diskutuam gjithashtu për diplomacinë, pasi është e rëndësishme të ringjallet procesi diplomatik. Ekipet tona do të koordinohen për komunikimin e mëtejshëm”, u shpreh ai.
Presidenti ukrainas e cilësoi takimin si pozitiv, duke theksuar se me Trump diskutoi rëndësinë e mbrojtjes së qytetarëve ukrainas dhe mënyrat se si SHBA mund ta ndihmojë Ukrainën me sisteme të mbrojtjes nga raketat.
Megjithatë, pala amerikane mbetet e rezervuar për dërgimin e menjëhershëm të armëve shtesë, duke argumentuar se edhe rezervat e saj janë kufizuar. Sipas raportimeve, një pjesë e sistemeve të kërkuara nga Kievi janë përdorur tashmë nga ushtria amerikane gjatë operacioneve ushtarake në Iran.
Analistët vlerësojnë se, megjithëse rimbushja e shpejtë e rezervave amerikane është e vështirë, lejimi i Ukrainës për të prodhuar vetë armë me licencë do të rriste kapacitetet e saj mbrojtëse dhe, në afatgjatë, do të lehtësonte edhe ngarkesën mbi industrinë ushtarake amerikane. Për më tepër, përvoja e fituar nga ushtria ukrainase në fushën e betejës mund të kontribuojë në zhvillimin e sistemeve më efikase dhe me kosto më të ulët.
