Fatmira Nikolli
Ndërtimet në Pogradec dhe Tushemisht, kanë mbërritur deri në Sesionin e 48-të të Komitetit të Trashëgimisë Botërore të UNESCO‑s. Projektet e propozuara duket se rrezikojnë statutin e Liqenit ne UNESCO.
Rrjeti Global i Vëzhgimit të Trashëgimisë Botërore ka shprehur në Sesionin e 48-të të Komitetit të Trashëgimisë Botërore të UNESCO‑s, zhgënjimin e madh që komiteti ka dështuar përsëri të përfshijë trashëgiminë kombëtare dhe kulturore të rajonit të Ohrit në listën e trashëgimisë botërore në rrezik.
Në takimin e mbajtur më 24 korrik, u kritikua fakti që për të dytin vit radhazi, Turqia ka sfiduar përfundimet e organeve këshillimore dhe ka dobësuar autoritetin e ekspertëve të pavarur sa I takon gjendjes në dy anët e Liqenit të Ohrit, kërcënuar nga ndërtimet dhe planet e zhvillimit.“Provat janë të pamohueshme, liqeni i Ohrit mbetet nën presion të rëndë dhe në rritje.
Vlera e tij e jashtëzakonshme universale është në rrezik dhe ndikimet në rritje që vazhdojnë ta çojnë këtë vend unik të trashëgimisë drejt dëmtimeve të pakthyeshme. Lista e trashëgimisë botërore në rrezik ekziston pikërisht për një moment si ky. Kur bashkësia ndërkombëtare duhet të veprojë para se të jetë tepër vonë” tha përfaqësuesi i Rrjetit Global të Vëzhgimit të Trashëgimisë Botërore.
Duke vlerësuar kërcënimet serioze, Komiteti i Trashëgimisë Botërore I dha Shqipërisë dhe Maqedonisë së veriut, pesë vite për të zbatuar rekomandimet.
“Nga ana shqiptare, projekti i peizazhit ujor Drilon-Tushemisht, zhvillimi ndërtimor pesëkatësh në Tushemisht dhe Pogradec Marina e propozuar me 27 kate, tregojnë shkallën alarmante të kërcënimit. Ne i përgëzojmë organet këshillimore për integritetin dhe përkushtimin e tyre. Komiteti do të vazhdojë të mbikëqyrë një përkeqësim të pronës derisa autenticiteti dhe integriteti i saj të humbasin plotësisht.
Sot, për fat të keq, në sytë e publikut, politika mbizotëroi mbi detyrën tonë për të mbrojtur liqenin e Ohrit”, u tha ne sesionin e 48-të.Përfaqësuesi I Shqipërisë, mori zotim për zbatimin e vendimit të komitetit dhe rekomandimeve të misioneve të monitorimit reaktiv. UNESCO vuri në dukje se ndërtimet pa leje, urbanizimi i pakontrolluar, dëmtimi i vijës bregliqenore, menaxhimi i pamjaftueshëm i ujërave të zeza dhe mbrojtja e pamjaftueshme e ekosistemit mbeten kërcënimet kryesore për Rajonin e Ohrit.