Gjykata Kushtetuese e Polonisë ka vendosur që nga tani e tutje shteti do të njohë ligjërisht vetëm martesat ndërmjet një burri dhe një gruaje, duke rrëzuar ndryshimet ligjore që do të mundësonin regjistrimin e martesave të së njëjtës gjini të lidhura në vende të tjera të Bashkimit Evropian.
Vendimi unanim i gjykatës e shpall të papajtueshme me Kushtetutën regjistrimin në regjistrin civil polak të martesave të së njëjtës gjini të lidhura jashtë vendit. Sipas gjykatës, Kushtetuta e Polonisë e përcakton qartë martesën si bashkim mes një burri dhe një gruaje dhe çështjet që lidhen me familjen dhe martesën janë kompetencë e autoriteteve kombëtare.
Ky vendim anulon legjislacionin që qeveria kishte miratuar në maj dhe që pritej të hynte në fuqi në fund të gushtit. Ndryshimet ishin ndërmarrë për të zbatuar një vendim të Gjykatës së Drejtësisë së Bashkimit Evropian të nëntorit 2025, sipas të cilit Polonia duhej të regjistronte statusin martesor të çifteve të së njëjtës gjini që ishin martuar ligjërisht në një shtet tjetër të BE-së dhe më pas ishin vendosur në Poloni, me qëllim garantimin e të drejtave që burojnë nga martesa.
Rasti nisi pas padisë së dy burrave, një shtetas polak dhe një shtetas me dyshtetësi polake-gjermane, të cilët u martuan në Gjermani në vitin 2018 dhe u transferuan në Poloni një vit më vonë.Vendimi i fundit pritet të thellojë përplasjen mes Gjykatës Kushtetuese të Polonisë dhe institucioneve të drejtësisë së Bashkimit Evropian, të cilat prej vitesh kanë mosmarrëveshje lidhur me epërsinë e ligjit evropian dhe kompetencat e shteteve anëtare.
Zëvendëskryeministri Krzysztof Gawkowski kritikoi vendimin, duke deklaruar se qeveria do të vazhdojë të kërkojë zgjidhje për të ruajtur statusin ligjor të martesave të së njëjtës gjini që ishin njohur më parë.
Polonia mbetet një nga vetëm katër vendet e Bashkimit Evropian që nuk lejon as martesat dhe as bashkimet civile të çifteve të së njëjtës gjini, së bashku me Bullgarinë, Rumaninë dhe Sllovakinë.