Në Shtetet e Bashkuara të Amerikës (SHBA) ka shpërthyer një alarm i paprecedent parlamentar lidhur me ndikimin e krimit të organizuar dhe rrjeteve të narkotrafikut që kanë lidhje me Shqipërinë. Kongresi amerikan ka vendosur në qendër të shënjestrës drejtuesit e qeverisë shqiptare, duke kërkuar llogari të drejtpërdrejta nga administrata e Uashingtonit. Gjatë një seance dëgjimore të mbajtur këtë të martë në Nënkomitetin për Europën në Komitetin e Punëve të Jashtme, situata në Ballkanin Perëndimor solli përplasje tejet të forta.
Kongresmeni republikan, Joe Wilson lëshoi akuza direkte ndaj kryeministrit Edi Rama, duke pretenduar se qeveria e tij po nxit dhe lehtëson krijimin e rrjeteve të trafikut ndërkombëtar të drogës. Wilson ngriti shqetësime alarmante për nivelin e lartë të korrupsionit, integrimin e krimit dhe cenimin e integritetit të zgjedhjeve në Shqipëri.Ai i kërkoi llogari drejtpërdrejt Departamentit të Shtetit se çfarë masash konkrete po merren ndaj këtij kërcënimi me përmasa rajonale. I gjendur përballë pyetjeve të prera, Zëvendësndihmës Sekretari Amerikan i Shtetit, Daniel Lawton, konfirmoi shqetësimet e Uashingtonit.
Zyrtari i lartë pranoi se organizatat kriminale që veprojnë nga Shqipëria kanë ndërtuar tashmë lidhje direkte me kartelet e drogës në Hemisferën Perëndimore. Lawton theksoi se SHBA po vazhdon bashkëpunimin me autoritetet vendase, ndërsa veçoi Prokurorinë e Posaçme (SPAK) si një strukturë që ka treguar efektivitet në goditjen e këtyre fenomeneve. Megjithatë, presioni politik në Capitoll Hill ndaj pushtetit në Tiranë ka arritur nivelin më të lartë historik.Prapaskenat
Por prapaskenat e këtij debati zbulojnë një lëvizje ligjore me pasoja ekstremisht të rënda për kreun e ekzekutivit shqiptar, Edi Rama. Kongresmeni Joe Wilson ka depozituar një amendament “bombastik”, i cili ka kaluar me urgjencë procedurale në Komisionet e Rregullores dhe Ligjeve në SHBA. Ky dokument detyron Departamentin e Shtetit dhe Drejtorin e Inteligjencës Kombëtare të bëjë një radiografi të thellë e sekrete mbi narkotrafikun shqiptar.
Mësohet se Agjencitë më të fuqishme partnere, përfshirë CIA‑n dhe DEA‑n, kanë marrë një afat të prerë e të frikshëm gjashtë muaj (180 ditë) për të mbyllur hetimet. Brenda këtyre 6 muajve, inteligjenca amerikane duhet t’i dorëzojë Presidentit të SHBA-së dhe Kongresit një raport të klasifikuar me të dhëna konfidenciale.Ky dokument do të skanojë me imtësi rolin e drejtpërdrejtë apo lehtësimin që qeveria e Edi Ramës mund t’u ketë bërë rrjeteve të narkotrafikut. Amendamenti ka kaluar filtrat kryesorë parlamentarë dhe pritet të martohet me votim në seancën plenare të Kongresit Amerikan.
Pasojat për Shqipërinë
Ndërkohë theksojmë se miratimi i këtij amendamenti dhe hartimi i raportit të inteligjencës pritet të ketë rrjedhojë të menjëhershme në izolimin politik të pushtetit qendror në Tiranë. Një hetim i tillë i klasifikuar mund të çojë në rishikimin e thellë të marrëdhënieve diplomatike dhe financiare midis Uashingtonit dhe Shqipërisë. Për më tepër, gjetjet e CIA‑s dhe DEA‑s mund të shërbejnë si bazë e fortë për sanksione të reja ndaj zyrtarëve të lartë shqiptarë. Kjo situatë do të rrisë ndjeshëm presionin ndaj SPAK-ut për të thelluar hetimet mbi lidhjet e politikës me krimin e organizuar.
Gjithashtu, imazhi ndërkombëtar i vendit do të pësojë një goditje të rëndë, duke cenuar besueshmërinë në proceset e integrimit euroatlantik. Partnerët ndërkombëtarë mund të kushtëzojnë mbështetjen e tyre me rezultate konkrete në pastrimin e institucioneve nga elementët e korruptuar.
Në fund, ky skanim 6‑mujor mund të shkaktojë një tërmet të vërtetë politik që do të rikonfigurojë të gjithë skenën politike shqiptare, ku goditja kryesore do të përqendrohet tek kryeministri Edi Rama, i cili tashmë është futur në rreth të kuq nga amerikanët. Pra e gjithë kjo tregon se nuk ka më asnjë dyshim se Uashingtoni ka vendosur të ndjekë deri në fund fijen e lidhjeve mes pushtetit politik në Shqipëri dhe karteleve transnacionale të drogës.
