Përgjimi i publikuar nga ish-zv/kryeministri Arben Ahmetaj merr përmasa edhe më të thella, teksa dalin në dritë identitetet e personazheve që shfaqen në bisedën me biznesmenin izraelit Ron Yeffet. Sergei është një ish-deputet ukrainas dhe tashmë tregtar armësh. Ai është Serhiy Pashinsky, ortak i Ihor Kotvitskyt në tregtinë e armëve.
Ai është nën akuzë nga Ukraina për korrupsion në tregtinë e armëve. Profili i tij është me interes të veçantë për shkak të kontekstit në të cilin Ahmetaj publikoi audiopërgjimin. Ish-zv/kryeministri e shoqëroi materialin me pretendime që lidhen me industrinë ushtarake, KAYO‑n dhe një trafik të mundshëm armësh ku dyshohet se është implikuar drejtpërdrejt kryeministri Rama. Ish-deputeti ukrainas bandit, grabitës biznesesh dhe trafikant armësh
Përveç trafikut të armëve, në të kaluarën emri i Sergeit të Roni Yeffet është përmendur edhe në një përplasje të dhunshme për marrjen e kontrollit të një prej fabrikave ushqimore më të njohura në Ukrainë. Bëhet fjalë për fabrikën ushqimore të Zhytomirit, një biznes që sipas përshkrimit të Çollakut prodhon çokollata, bonbone, karamele, pije me gaz dhe pa gaz, biskota e vafer dhe i eksporton produktet në 26 vende të botës.Çollaku e përshkruan Sergein e Ron Yeffet si një person të lidhur edhe me tentativa për marrjen me forcë të bizneseve dhe shkruan se ai ishte “i specializuar dhe për grabitje me armë fabrikash ushqimore”. Sipas Çollakut, historia lidhet me pronarin e fabrikës së Zhytomirit, Igor Bojko. Ai pretendon se Bojko kishte refuzuar t’ua shiste fabrikën Sergei Pashynskyi dhe ortakut të tij, Sergei Tishçenko.
Pas këtij refuzimi, sipas versionit të sjellë nga Çollaku, rreth 200 persona të njohur si “titushki” u dërguan drejt fabrikës me autobusë. Ata, sipas dëshmisë së pronarit të cituar nga gazetari, ishin të armatosur dhe hynë në ambientet e fabrikës, duke sulmuar punonjësit. “Sergei Pashinski dhe ortaku i tij Sergei Tishçenko, pas refuzimit për t’ua shitur fabrikën shumë rentabël atyre, financuan 200 mercenarë, të mbiquajtur ‘titushki’, të cilët mbërritën me autobusë dhe sulmuan me armë fabrikën duke depërtuar në brendësi të mjediseve të saj duke terrorizuar punonjësit, kryesisht femra”, shprehet Bojko sipas Çollakut.
Pas përplasjes, çështja u vu nën hetim. Çollaku thotë se NABU ndërhyri në këtë histori dhe se 134 nga rreth 200 personat e përfshirë u arrestuan. Pra, historia që sjell gazetari nuk është thjesht për një konflikt mes dy biznesmenësh. Në qendër është pretendimi për një përpjekje për marrjen e kontrollit të një fabrike të madhe përmes një grupi të armatosur, ndërsa hetimi i autoriteteve ukrainase çoi në arrestimin e dhjetëra personave.Detajet
Çollaku komentoi dje gjithashtu modelin “KAYO” dhe infiltrimin e dyshimtë në ushtri, shëndetësi, energjetikë dhe të dhënat sekrete shtetërore përmes izraelitit Ron Yeffet dhe kompanisë TIMAK, duke ngritur alarmin e cenimit të drejtpërdrejtë të NATO‑s. “Rasti i KAYO‑s, çfarë ka ndodhur? E kemi në ushtri, shëndetësi, bujqësi, rezervat e energjisë, tek të dhënat sekrete… Është Ron Yeffet. Ron Yeffet ka bërë xheloze edhe Ballukun, duke thënë se do merrej vetë me Ministrinë e Energjetikës, por u mor vetë me Ministrinë e Mbrojtjes. Ron Yeffet është lidhje personale e Ramës.
Ky nuk përfaqëson qeverinë e Izraelit siç tenton Rama ta shesë”, nënvizoi gazetari. Prapaskena më e rëndë ushtarake lidhet me bashkëpunimin e kompanisë TIMAK me struktura të lidhura me ushtrinë kineze, pavarësisht sanksioneve të SHBA-së: “Futin në NATO dhe ushtri këtë Arjeta Puca, mikja e Ron Yeffet… Në njoftimet e saj publike kanë krijuar në vitin 2025 ‘Timak China’.
Thotë do prodhojmë armë e makina me Kinën. Kanë marrëveshje me dy kompani, të cilat në vitet 2025–2026 janë të sanksionuara nga Pentagoni për lidhje me ushtrinë kineze për spiunazh ushtarak. NATO i sanksionon dhe ti shkon e bën biznese me këto kompani? Në dijeninë tonë Kina nuk është në NATO. Kjo është komedia e zezë që shet kryeministri.”
