Nga Ministria e së Vërtetës.
Pasi pushtoi tregun global me produkte ushtarake të teknologjisë së lartë, Kryeministri Edi Rama njoftoi sot se avioni i ardhshëm presidencial i Shteteve të Bashkuara, i njohur si Air Force One, do të prodhohet tërësisht në Shqipëri nga kompania “TIMAK Defence”.
Lajmi i bujshëm erdhi përmes një postimi në rrjetet sociale, ku Kryeministri publikoi pamje nga makina e parë ushtarake “Made in Albania”, një mjet që sipas burimeve jozyrtare ka kaluar testet e NATO‑s duke ecur me sukses mbi tre rrethrrotullime të reja në autostradën Tiranë-Durrës pa u gërvishtur.
“Mirëmëngjes! Me krenarinë e prodhimit të parë ushtarak sipas standardeve super-NATO, ju njoftoj se brenda 30 muajve TIMAK jo vetëm që do të furnizojë ushtrinë tonë, por do të ndërtojë edhe avionin e ri të Shtëpisë së Bardhë. Pentagoni ka pranuar që avioni i tyre të ketë tapiceri me punim dore nga Përmeti dhe ngjyrë vjollcë me Nuancë Rilindjeje,” shkroi Rama në Facebook, shoqëruar me një video 8‑minutëshe me muzike në prapavijë.
Sipas kryeministrit, kompania vendase ka nënshkruar tashmë marrëveshje me 30 vende të botës, përfshirë fuqi të mëdha si San Marino dhe një fis i panjohur në Amazonë.
Burime nga Uashingtoni konfirmojnë se SHBA u bind përfundimisht kur Rama u garantoi se mjetet blinduara shqiptare vijnë me sistem automatik për shmangien e gropave të rrugëve dhe janë të pajisura me gomat më të mira të përdorura nga Zvicra.
I pyetur nga gazetarët se si do t’ia dalë një kompani që deri dje prodhonte ambulanca të ndërtojë një avion presidencial supersonik stealth, Rama u përgjigj shkurt: “Kush ka dyshime, le të shohë këtë render 3D në 4K që kemi bërë me 3D Max. Të tjerat janë kazani i opozitës. Ju uroj fundjavë të qetë!”