Më 12 gusht 2026, Hëna do të mbulojë për disa minuta plotësisht Diellin, duke sjellë eklipsin e parë total të dukshëm në Europë që nga viti 1999. Ky spektakël i rrallë astronomik do të përkojë edhe me kulmin e shiut të meteorëve Perseide, duke e bërë mbrëmjen e 12 gushtit një nga ngjarjet më të veçanta të vitit për adhuruesit e qiellit.
Eklipsi total ndodh kur Hëna kalon përpara Diellit dhe e mbulon atë plotësisht. Kjo do të jetë e mundur pasi Hëna do të ndodhet shumë pranë perigjeut, pikës më të afërt të orbitës së saj me Tokën.
Pamja më spektakolare do të jetë në Islandën perëndimore dhe në veri të Spanjës. Në territorin spanjoll, brezi i eklipsit do të kalojë nga Galicia deri në Ishujt Balearë, duke përfshirë qytete si Bilbao, Burgos, Zaragoza, Valencia dhe Palma. Fenomeni do të shihet gjithashtu në një pjesë të Portugalisë, si edhe në disa zona të Groenlandës dhe Rusisë.
Në pjesën më të madhe të Europës, përfshirë Italinë, eklipsi do të jetë vetëm i pjesshëm. Në Itali, ai do të ndodhë në mbrëmje, kur Dielli do të jetë shumë pranë horizontit. Rajonet më të favorizuara do të jenë Piemonte, Valle d’Aosta, Liguria, Lombardia, Emilia-Romagna, Toskana dhe Sardenja. Në veriperëndim të vendit, Hëna do të mbulojë deri në 90% të diskut diellor, por nuk do të krijohet errësira karakteristike e një eklipsi total.
Astronomët këshillojnë që disa ditë përpara fenomenit të kontrollohet pamja drejt horizontit perëndimor, pasi kodrat ose malet mund ta fshehin Diellin në momentin e eklipsit.
Për ata që nuk do të kenë mundësi ta shohin këtë fenomen, rasti i radhës do të jetë më 2 gusht 2027, kur eklipsi total do të kalojë mbi Mesdhe dhe Afrikën e Veriut. Në Itali, ai do të shihet shumë mirë në jug të Siçilisë, ndërsa faza e plotë do të jetë e dukshme vetëm në det, pranë ishullit të Lampedusës.
Ky do të jetë gjithashtu eklipsi total më i gjatë që nga viti 2009, me një kohëzgjatje maksimale prej 6 minutash e 23 sekondash.
